انا دا اول موضوع ليا هنا

انا اسف لو كان سياسي شويه

بس لازم نشوف مصلحه بلدنا مصر

انا نازل يوم الجمعة متشح بالسواد حداد على اخويا وابن بلدي خالد سعيد



ايوة هنزل ومش هسكت تاني .. هنزل عشان كفاية ظلم وجهل وسلبية



هنزل عشان اشارك مع مئات زيي في التغيير



عشان كفااية شعارات وتنديد



عشان اتكلم وانا راسي مرفوع



عشان الصمت والسكوت هما اللي ملوا مننا وقرروا انهم يتكلموا



هنزل عشان ابن بلدي اللي اتضرب واتهان واتعذب واتقتل لمجرد..



لمجرد اانه رفع راسه وقال لا



وحاول يكشف قضية فساد للضباط اللى المفروض انهم يحمونا من الجرايم والمخدرات



لا هم اللي بيوزعوها .. !!



خالد مات عشاني وعشانك وعشاان كل المصريين



ماات وهو بيحاول يعلمنا نصرخ بكلمة دايما كنا بنقولها لوحدينا في الضلمة في سرنا



انا خلاص اتعلمت الكلمة ومش هخاف اقولها



دمك مش هيروح .. انت مش رخيص .. وحقك .. ارتاح واحنا هنجبهولك



انا هنزل يوم الجمعة الكورنيش مع غيري كتير ستة ونص



والشمس لونها بيحمر وبتبكي عليك



هندعيلك كلنا والنيل شاهد علينا وسامع دعانا وقرآننا



وهسمعه بيردد ورانا في خشوع



هتفضل خالد في قلوبنا واذهاننا



واقسم بربي مش هننسى دمك



صحيح هنقف وقفة صامتة .. بس تحمل ابلغ المعاني



انت اللي جمعتنا .. من بعد كده .. خلاص سهل اننا نتوحد ونتجمع كلنا



ها .. لسه ساكتين ؟!



كفيانا بقي ذل كفايانا انكسار وخوف



خلاص علمونا نخاف



30 سنه قانون طوارئ



30 سنه خوف ورعب



عمرنا ما كنا كده



خلاص انا مبقتش اخاف ومش هخاف تاني



انا نازل وقفه الجمعه



مش علشان الشهيد خالد بس



علشان نعرفهم اننا بقينا فاهمين



عارفين فين حقوقنا



واننا مش هنسكت تاني خلاص



البلد دي بلدنا ولازم يبقالنا صوت





الجمعه الجايه يوم مش عادي

الجمعه الجايه موافق 23 يوليو

في نفس اليوم ده سنه 1952 نزلو جدودنا الاحرار

وخلو الشعب كله ايد واحده

هدفهم كان القضاء علي الاقطاع و علي الاستعمار وعلي سيطره راس المال

اقامه حياه ديمقراطيه وجيش وطني قوي و عداله اجتماعيه

وقدرو يغيرو صفحات التاريخ

الجمعه 23 يوليو 2010 هنتجمع كلنا

نطالب باقل حقوقنا

الحمايه و الامان

لازم نتجمع كلنا اييد واحده

ومنخافش واحنا بنطالب بحقوقنا

شكراا لكل الايجابيين الي وقفو معانا المره الي فاتت






ربنا يبارك في شباب المنوفيه

دي صور الوقفه في شبين الكوم






الصمت فعلا بياثر








اسف لو طولت عليكم

تحياتي

ma7moud كتب:عبوده يا برنس
دى بس كل الصور

يا جماعه فى الاول عبوده دى صاحبى وانتيمى يا عنى مش اى حد
ودى وقفه احتجاج ع مقتل الشاب خالد اكيد كلنا عرفنا قصته وكتير منا اتأثر بيها
وبجد حرام اللى حصله ده
وفعلا زى ما الصور بتقول لازم دمه مش يروح بلاش لازم يكون فى ناس تقول لاء ع اى حاجه غلط

.
عندك حق يا محمود مش لازم نسكت تاني

عايزينهم يعرفوا
ان إحنا شباب مصر
.. احنا الشباب اللي اتولد في التمانينات والتسعينات ..
.. احنا الجيل اللي مش بتعرفوا تكلموه لأنه مش بيقرأ الاهرام ولا بيتفرج على القناة التانيه ولا بنسمع اخترناك وهنمشي وراكلنا
احنا عندنا أحلام وآمال وأسلوب حياة

وإحنا مش هنسيب اللي حصلنا يحصل في ولادنا
هنغيرك يا مصر بادينا

شكراا ليك يا محمود